(کشمیر ڈیجیٹل) بھارت کی جانب سے دریائے ستلج میں مزید پانی چھوڑے جانے کے بعد دریا کے بہاؤ میں تیزی آ گئی ہے جس کے نتیجے میں ضلع پاکپتن میں سیلابی صورتحال مزید سنگین ہوگئی ہے۔
جیو نیوز کے مطابق بھارتی ہائی کمیشن نے وزارت آبی وسائل کو اطلاع دی کہ دریائے ستلج میں پانی چھوڑا جارہا ہے، جس پر وزارت نے فوری طور پر فلڈ الرٹ جاری کردیا۔
پنجاب ڈیزاسٹر مینجمنٹ اتھارٹی (پی ڈی ایم اے) نے خبردار کیا ہے کہ دریا میں پانی کے بہاؤ میں مزید اضافہ متوقع ہے۔ اس وقت ستلج کے ہریکے ڈاؤن اسٹریم اور فیروزپور ڈاؤن اسٹریم میں اونچے درجے کا سیلاب ریکارڈ کیا جارہا ہے۔ پی ڈی ایم اے نے تمام متعلقہ اداروں کو شہریوں کی جان و مال کے تحفظ کے لیے ہنگامی اقدامات کرنے کی ہدایت دی ہے۔
فلڈ کنٹرول روم کے مطابق دریائے ستلج میں ہیڈ سلیمانکی کے مقام پر بھی اونچے درجے کا سیلاب جاری ہے۔ اب تک ضلع پاکپتن کے متاثرہ علاقوں سے 24 ہزار 974 افراد کو محفوظ مقامات پر منتقل کیا جاچکا ہے۔
سیلاب سے 23 گاؤں مکمل طور پر زیرآب آگئے جبکہ 53 گاؤں جزوی متاثر ہوئے ہیں۔ مجموعی طور پر ضلع میں 64 ہزار 663 افراد سیلاب سے متاثر ہوئے ہیں۔ رپورٹ کے مطابق 66 ہزار 913 ایکڑ زرعی زمین بھی سیلاب کی نذر ہوگئی ہے، جبکہ متاثرہ علاقوں سے 4 ہزار 106 مویشیوں کو محفوظ مقامات پر منتقل کرلیا گیا ہے۔
یہ بھی پڑھیں: چنگان کی بڑی پیشکش! آلسیون بلیک سیریز نیا اسٹائل اور جدید فیچرز کے ساتھ لانچ
