مظفرآباد : امریکی صدر ڈونلڈ ٹرمپ نے ٹیسلا اور سوشل میڈیا سائٹ ایکس کے مالک ایلون مسک کی جانب سے نئی سیاسی جماعت کے قیام کو مضحکہ خیز قرار دے دیا ہے۔
ایلون مسک، جو ٹرمپ انتظامیہ میں محکمہ برائے حکومتی کارکردگی (DOGE) کے سابق سربراہ رہ چکے ہیں، نے گزشتہ روز امریکہ میں ’امریکا پارٹی‘ کے قیام کا اعلان کیا۔ انہوں نے اپنی ایکس پوسٹ میں کہا کہ یہ جماعت امریکیوں کو ان کی آزادی واپس دلانے کے لیے بنائی گئی ہے۔ اتوار کو نیو جرسی میں صحافیوں سے گفتگو کرتے ہوئے صدر ٹرمپ نے ایلون مسک کے اعلان پر ردعمل دیتے ہوئے کہا، “میرا خیال ہے کہ تیسری پارٹی شروع کرنا ایک مضحکہ خیز خیال ہے۔ تیسری پارٹی سے صرف الجھن میں اضافہ ہو گا۔”
انہوں نے مزید کہا کہ اگر ایلون مسک تیسری جماعت بنانا چاہتے ہیں تو وہ اس سے لطف اندوز ہو سکتے ہیں، لیکن میرے نزدیک یہ غیر ضروری اور فضول ہے۔ صدر ٹرمپ نے مزید کہا کہ اس ہفتے حماس کے ساتھ معاہدے کا اچھا موقع ہے، کچھ یرغمالیوں کی رہائی ممکن ہو سکتی ہے۔ انہوں نے نیتن یاہو اور ایران کے ساتھ مستقل ڈیل پر بات چیت کا بھی عندیہ دیا۔
صدر کا کہنا تھا کہ وہ ممکنہ طور پر جمعہ کو سیلاب سے متاثرہ ٹیکساس کا دورہ کریں گے۔
واضح رہے کہ ایلون مسک، صدر ٹرمپ کی سابقہ الیکشن مہم کے اہم حمایتی تھے، اور انہیں ٹرمپ حکومت کے دوران DOGE کا سربراہ مقرر کیا گیا تھا۔ بعد ازاں انہوں نے استعفیٰ دے دیا اور دونوں رہنماؤں کے درمیان تعلقات میں کشیدگی آتی گئی۔
