وفاقی حکومت نے خیبر پختونخوا کی انتظامی باگ ڈور میں اہم ترین تبدیلیاں کرتے ہوئے چیف سیکریٹری کی تقرری کا باضابطہ نوٹیفکیشن جاری کر دیا ہے، جس کے تحت ڈاکٹر محمد فخر عالم عرفان کو صوبے کا نیا چیف سیکریٹری تعینات کر دیا گیا ہے۔
جاری کردہ نوٹیفکیشن کے مطابق خیبر پختونخوا کے موجودہ چیف سیکریٹری شہاب علی شاہ کا تبادلہ کر دیا گیا ہے اور انہیں فوری طور پر اسٹیبلشمنٹ ڈویژن رپورٹ کرنے کی ہدایت کی گئی ہے۔
15 اعلیٰ افسران کے تبادلے اور نئی تعیناتیاں:
وفاقی حکومت نے خیبر پختونخوا میں تعینات پاکستان ایڈمنسٹریٹو سروس کے 15 افسران کو بھی اسٹیبلشمنٹ ڈویژن رپورٹ کرنے کا حکم دیا ہے، جن میں گریڈ 21 کے اکرام اللہ، گریڈ 20 کے شاہد اللہ اور گریڈ 19 کے شاہ فہد جیسے سینئر بیوروکریٹس بھی شامل ہیں۔
یہ بھی پڑھیں: وفاقی حکومت کا بڑا فیصلہ: ڈاکٹر محمد فخر عالم عرفان چیف سیکریٹری خیبر پختونخوا تعینات
علاوہ ازیں وفاقی حکومت کی جانب سے صوبے میں نئے افسران کی تعیناتیوں کے احکامات بھی جاری کیے گئے ہیں۔ ان فیصلوں کے تحت وزیراعظم ہاؤس کے ایڈیشنل سیکریٹری یحییٰ آخوندزادہ اور خواجہ سکندر ذیشان کی خدمات پنجاب حکومت سے لے کر خیبر پختونخوا حکومت کے سپرد کر دی گئی ہیں، جبکہ میجر (ر) اورنگزیب بادینی کا نیشنل انسٹی ٹیوٹ آف پبلک ایڈمنسٹریشن (نِپا) کوئٹہ سے خیبر پختونخوا تبادلہ کر دیا گیا ہے۔
اسلام آباد میں سیکیورٹی ہائی الرٹ اور معمولاتِ زندگی:
دوسری جانب خیبر پختونخوا میں ایمرجنسی کے نفاذ سے متعلق حکومتی فیصلے کے بعد وفاقی دارالحکومت میں سیکیورٹی کو انتہائی ہائی الرٹ کر دیا گیا ہے۔
مرکزی شاہراہوں پر کنٹینرز بدستور موجود ہیں اور ریڈ زون میں پولیس کا گشت مسلسل جاری رکھنے کے ساتھ سیکیورٹی کے غیر معمولی انتظامات کیے گئے ہیں، تاہم اس کے باوجود شہر میں معمولاتِ زندگی معمول کے مطابق جاری ہیں اور شہریوں کی آمدورفت بحال ہے۔
