مظفرآباد: نیشنل ڈیزاسٹر مینجمنٹ اتھارٹی (NDMA) نے موجودہ موسمی صورتحال کے تناظر میں پاکستان سمیت آزاد کشمیر، گلگت بلتستان اور خیبر پختونخوا کے بالائی علاقوں میں بڑھتے درجہ حرارت، تیز برف پگھلاؤ اور شدید بارشوں کے باعث فلیش فلڈ، لینڈ سلائیڈنگ اور گلیشیئر جھیلوں کے اچانک پھٹنے (GLOF) کے خطرات سے آگاہ کیا ہے۔ آزاد کشمیر میں بھی موسمیاتی تبدیلی کے اثرات نمایاں ہیں، جہاں غیر معمولی موسمی رویے کی وجہ سے دریاؤں، ندی نالوں اور قدرتی آبی گزرگاہوں میں پانی کے بہاؤ میں مسلسل اتار چڑھاؤ ریکارڈ کیا جا رہا ہے۔
ماہرین کا کہنا ہے کہ ہمالیہ کے پہاڑی سلسلوں میں گلیشیئرز کا تیزی سے پگھلنا اور مختصر دورانیے کی شدید بارشیں ندی نالوں کی طغیانی کا باعث بن سکتی ہیں، جو فلیش فلڈ کی صورت اختیار کر لیتی ہے۔
دشوار گزار جغرافیہ، حساس اضلاع اور انفراسٹرکچر کو خطرات
آزاد کشمیر کے جغرافیائی حالات، تنگ وادیاں اور بلند و بالا پہاڑ ان خطرات کو مزید بڑھا دیتے ہیں۔ مظفرآباد، جہلم ویلی، باغ، حویلی اور پونچھ کے ساتھ ساتھ وادی نیلم کو حساس ترین علاقوں کی فہرست میں رکھا گیا ہے۔ یہاں موسلا دھار بارش کے دوران پانی کے ساتھ مٹی، پتھر اور ملبہ نیچے آنے سے سڑکوں، پلوں، زرعی زمینوں اور عام آبادیوں کو شدید نقصان کا خدشہ رہتا ہے۔
اسی طرح این ڈی ایم اے کے مطابق گلگت بلتستان کے غذر، ہنزہ، نگر، شگر، گلگت، روندو، دیامر، استور، اسکردو، گانچھے اور کھر منگ کو بھی انتہائی حساس قرار دیا گیا ہے۔ دوسری جانب خیبر پختونخوا کے بالائی اضلاع چترال، اپر دیر، لوئر دیر، سوات، شانگلہ اور کوہستان کے ندی نالوں میں بھی طغیانی، لینڈ سلائیڈنگ اور پہاڑ کھسکنے کے شدید خدشات موجود ہیں۔
یہ بھی پڑھیں: بارش کے ایک اور اسپیل کا الرٹ جاری، کونسے علاقے متاثر ہوں گے؟
پیشگی تدابیر اور طویل المدتی حکمت عملی
موسمیاتی خطرات کا سامنا کرنے کے لیے ماہرین نے محض حادثے کے بعد امدادی کارروائی کے بجائے فلڈ وارننگ سسٹم کو فعال رکھنے، گلیشیئرز کی مسلسل نگرانی، خطرناک علاقوں میں غیر ضروری تعمیرات کی حوصلہ شکنی اور بروقت معلوماتی انتباہ جاری کرنے کی تاکید کی ہے۔
آزاد کشمیر اور شمالی علاقوں کے لیے بدلتا موسم پانی، زراعت اور انسانی آبادی کی حفاظت سے جڑا ایک بڑا چیلنج بن چکا ہے۔ جانی و مالی نقصان سے بچاؤ کے لیے تمام متعلقہ اداروں کا بروقت تحرک اور عوام تک حفاظتی ہدایات کی رسائی ناگزیر قرار دی گئی ہے۔
مزید پڑھیں: مون سون بارشیں: ڈپٹی کمشنر بھمبر کا اداروں کو الرٹ رہنے کا حکم
