پاکستان ٹیلی کمیونیکیشن اتھارٹی (پی ٹی اے) نے ملک بھر میں تمام موبائل آپریٹرز کے لیے پری پیڈ موبائل بیلنس کی کم از کم میعاد 180 دن مقرر کرنے کا بڑا قدم اٹھایا ہے۔ اس نفاذ کے بعد صارفین کے ری چارج اور بیلنس کی میعاد میں اضافہ ہوگا، جس کا باقاعدہ اطلاق یکم اکتوبر 2026ء سے تمام ٹیلی کام کمپنیوں پر لاگو کر دیا جائے گا۔
پاکستان ٹیلی کمیونیکیشن اتھارٹی کی جانب سے جاری کردہ احکامات کے مطابق ملک میں کام کرنے والے تمام موبائل فون آپریٹرز پابند ہوں گے کہ وہ ری چارج اور بیلنس کی کم از کم مدت 180 دن رکھیں گے۔ اس نفاذ کے بعد تمام پری پیڈ صارفین کا ری چارج کردہ بیلنس کم از کم 180 ایام تک مکمل طور پر محفوظ تصور کیا جائے گا اور اس سہولت سے تمام موبائل آپریٹرز کے صارفین یکساں طور پر مستفید ہو سکیں گے۔
میعاد ختم ہونے پر پرانے بیلنس کی خودکار بحالی:
پی ٹی اے کے اصول و ضوابط کے مطابق اگر مقررہ 180 دن کا وقت پورا ہونے پر بیلنس کی میعاد ختم بھی ہو جاتی ہے، تو نیا ری چارج کروانے کی صورت میں پرانا ختم شدہ بیلنس خودکار طور پر صارف کے اکاؤنٹ میں واپس شامل کر دیا جائے گا۔ تاہم اس خودکار بحالی کی سہولت سے فائدہ اٹھانے کے لیے بنیادی اور لازمی شرط یہ رکھی گئی ہے کہ متعلقہ صارف کی سم قابلِ استعمال اور ایکٹیو حالت میں موجود ہونی چاہیے۔
یہ بھی پڑھیں: سم کارڈ کے نام پر فراڈ، پی ٹی اے کا شہریوں کیلئے الرٹ جاری
صارفین کے حقوق کا تحفظ اور منصفانہ ماحول:
پاکستان ٹیلی کمیونیکیشن اتھارٹی نے اپنے اس بڑے اقدام کو موبائل فون صارفین کے بنیادی حقوق کے تحفظ اور پاسداری سے تعبیر کیا ہے۔ اتھارٹی کا مزید کہنا ہے کہ 180 دن کی میعاد مقرر کرنے کا یہ فیصلہ ملک میں ٹیلی کام شعبے کے اندر ایک شفاف، متوازن اور منصفانہ کاروباری ماحول کے فروغ کے لیے پی ٹی اے کے مسلسل عزم کا واضح اظہار ہے۔
