بحرین میں ہونے والے ایشین یوتھ گیمز والی بال ٹورنامنٹ میں پاکستان کی شاندار کامیابیوں کا سلسلہ جاری ہے۔ قومی یوتھ ٹیم نے بہترین کھیل پیش کرتے ہوئے ٹاپ 8 کلاسیفکیشن راؤنڈ کے دوسرے میچ میں سعودی عرب کو 1-3 سے شکست دے دی۔ پاکستانی ٹیم نے میچ کے آغاز سے ہی عمدہ کارکردگی دکھاتے ہوئے حریف ٹیم پر دباؤ برقرار رکھا۔
میچ کے پہلے سیٹ میں پاکستان نے 25-16 سے کامیابی حاصل کی، جس میں نوجوان کھلاڑیوں نے مضبوط دفاع اور تیز رفتار حملوں سے سعودی ٹیم کو سنبھلنے کا موقع نہ دیا۔ دوسرے سیٹ میں بھی پاکستان کی برتری برقرار رہی، جسے 25-21 کے اسکور سے اپنے نام کیا گیا۔ تیسرے سیٹ میں سعودی عرب نے کچھ مزاحمت دکھائی اور 23-25 سے جیت حاصل کی، تاہم چوتھے اور فیصلہ کن سیٹ میں پاکستانی ٹیم نے ایک بار پھر بہترین تال میل اور اعتماد کے ساتھ کھیلتے ہوئے 26-24 سے کامیابی حاصل کرلی۔
پاکستان یوتھ والی بال ٹیم کی اس کامیابی میں خضر حیات، یحییٰ اور محمد انس نے نمایاں کردار ادا کیا۔ ان کھلاڑیوں نے نہ صرف بہترین اسپائکس لگائے بلکہ دفاعی انداز میں بھی شاندار مظاہرہ کیا۔ ان کی کارکردگی نے ٹیم کے دیگر کھلاڑیوں کے حوصلے بلند کیے اور میدان میں پاکستانی ٹیم نے بھرپور اتحاد کا مظاہرہ کیا۔
ٹیم کے اندر جذبۂ فتح نمایاں طور پر نظر آیا، جس نے انہیں مسلسل دوسری کامیابی دلائی۔ بحرین میں جاری ایونٹ میں پاکستان کی یہ جیت اس بات کی عکاسی کرتی ہے کہ ملک کے نوجوان کھلاڑی بین الاقوامی سطح پر اپنی صلاحیتوں کا لوہا منوا رہے ہیں۔
واضح رہے کہ پاکستان والی بال ٹیم اپنا کوارٹر فائنل میچ اتوار کے روز کھیلے گی۔ شائقینِ کھیل ٹیم کی حالیہ کامیابی پر خوشی کا اظہار کر رہے ہیں اور اُمید ظاہر کر رہے ہیں کہ قومی یوتھ ٹیم اگلے مرحلے میں بھی شاندار کارکردگی دکھا کر ایونٹ میں کامیابیوں کا سلسلہ برقرار رکھے گی۔
یہ بھی پڑھیں: نومبر 2024 میں عمران خان کی رہائی طے پا چکی تھی، شیر افضل مروت کا دعویٰ
واضح رہے کہ پاکستان والی بال ٹیم اپنا کوارٹر فائنل میچ اتوار کے روز کھیلے گی۔ شائقینِ کھیل ٹیم کی حالیہ کامیابی پر خوشی کا اظہار کر رہے ہیں اور اُمید ظاہر کر رہے ہیں کہ قومی یوتھ ٹیم اگلے مرحلے میں بھی شاندار کارکردگی دکھا کر ایونٹ میں کامیابیوں کا سلسلہ برقرار رکھے گی۔
