پاکستان کرکٹ بورڈ (پی سی بی) نے بھارتی کرکٹر سوریا کمار یادیو کے بعد ایک اور بھارتی کھلاڑی کے خلاف انٹرنیشنل کرکٹ کونسل (آئی سی سی) میں شکایت درج کرا دی ہے۔
ذرائع کے مطابق پی سی بی نے بھارتی ٹیم کے فاسٹ بولر ارشدیپ سنگھ کے خلاف درخواست جمع کروائی ہے جس میں مؤقف اختیار کیا گیا ہے کہ انہوں نے 21 ستمبر کو میچ کے اختتام پر تماشائیوں کی جانب نازیبا اور غیر اخلاقی اشارے کیے۔ شکایت میں کہا گیا ہے کہ یہ عمل آئی سی سی کوڈ آف کنڈکٹ کی خلاف ورزی ہے اور کھیل کی ساکھ کو مجروح کرتا ہے۔
پی سی بی کی جانب سے مطالبہ کیا گیا ہے کہ ارشدیپ سنگھ کے خلاف ضابطہ اخلاق کی خلاف ورزی پر ایکشن لیا جائے۔
یہ بھی پڑھیں: بھارت کی سرپرستی میں ہونے والی دہشت گردی کے خلاف جنگ لڑ رہے: پاکستان
واضح رہے کہ اس سے قبل پاکستان کرکٹ بورڈ نے بھارتی ٹیم کے کپتان سوریا کمار یادیو کے خلاف بھی شکایت درج کرائی تھی۔ پی سی بی کا کہنا تھا کہ سوریا کمار نے میچ کے بعد پریس کانفرنس میں سیاسی گفتگو کر کے کھیل کی روح کو نقصان پہنچانے کی کوشش کی۔
