(کشمیر ڈیجیٹل) پاکستان اور ایران کے درمیان فضائی معاہدہ کامیابی کے ساتھ طے پا گیا ہے جس کے تحت دونوں ملکوں کے درمیان براہ راست پروازوں کا آغاز ہو گیا۔ اس حوالے سے پاکستان میں تعینات ایرانی سفیر ڈاکٹر رضا امیری مقدم نے باضابطہ اعلان کیا۔
ایرانی سفیر نے کہا کہ یہ معاہدہ صدر ایران کے حالیہ دورہ پاکستان کے نتیجے میں ممکن ہوا ہے۔ انہوں نے حکومت پاکستان کی تعاون اور سہولت کاری پر شکریہ ادا کرتے ہوئے کہا کہ یہ اقدام دونوں ملکوں کے درمیان تعلقات کے ایک نئے دور کی شروعات ہے۔
سفیر کے مطابق ایران کی معروف فضائی کمپنی ’’ایران ایئر ٹور‘‘ اسلام آباد کے لیے پہلی براہ راست پرواز چلائے گی۔ اس اقدام سے نہ صرف سیاحت کو فروغ ملے گا بلکہ عوامی روابط اور کاروباری تعلقات بھی مزید مستحکم ہوں گے۔
ڈاکٹر رضا امیری مقدم نے کہا کہ اس پیش رفت سے دونوں ممالک کے عوام، سیاحت سے وابستہ افراد اور کاروباری طبقے کو براہ راست فائدہ ہوگا۔ ان کا کہنا تھا کہ ایرانی شہری پاکستان کے خوبصورت مناظر اور مہمان نوازی سے بھرپور لطف اندوز ہوں گے، جبکہ براہ راست پروازوں سے سیاحت پہلے سے کہیں زیادہ ترقی کرے گی۔
