مظفرآباد (کشمیر ڈیجیٹل)چیف جسٹس آزاد جموں و کشمیر، جسٹس راجہ سعید اکرم خان کی سربراہی میں سپریم کورٹ آزاد جموں و کشمیر کی گولڈن جوبلی تقریبات اور جوڈیشل کانفرنس کے حوالے سے اہم اجلاس منعقد ہوا۔ اجلاس میں جسٹس رضا علی خان بھی شریک تھے ۔
اجلاس کا مقصد اور فیصلے
اجلاس میں سپریم کورٹ کی گولڈن جوبلی تقریبات اور جوڈیشل کانفرنس کے انعقاد کے لیے نئی تاریخوں کا اعلان کیا گیا ۔ تقریبات 11 سے 13 ستمبر 2025 تک منعقد ہونگی ۔ اس موقع پر جوڈیشل کانفرنس بھی ہوگی ، جس میں چیف جسٹس پاکستان ، جسٹس یحیٰ آفریدی مہمان خصوصی ہوں گے ۔
تقریب میں سپریم کورٹ پاکستان کے معزز ججز ، صوبائی ہائی کورٹس، اسلام آباد ہائیکورٹ، گلگت بلتستان کی سپریم اپیلیٹ کورٹ اور چیف کورٹ کے چیف جسٹس و ججز، آزاد جموں و کشمیر ہائیکورٹ کے چیف جسٹس و ججز، وکلاء ، وفاقی و صوبائی قانون کے حکام، اور مختلف بار کونسلز کے صدر و عہدیداران بھی شریک ہوں گے ۔
اجلاس میں شامل اعلیٰ افسران
رجسٹرار مظہر اقبال، ایڈیشنل رجسٹرار ملک احتشام، ایڈیشنل رجسٹرار ریسرچ ظہور اقبال، سیکرٹری ٹو چیف جسٹس خواجہ محمد شوکت ، سینئر اکاؤنٹس آفیسر سید سخاوت حسین، اسسٹنٹ رجسٹرار نثار شاہین ، سینئر پروٹوکول آفیسر خواجہ اعجاز احمد ، اسٹاف آفیسر تیمور ممتاز ، ڈائریکٹر آئی ٹی صفوان ہاشمی ، پروٹوکول آفیسر تیمور درانی اور دیگر متعلقہ افسران نے بھی اجلاس میں شرکت کی ۔
چیف جسٹس کا بیان
چیف جسٹس آزاد جموں و کشمیر نے اجلاس سے خطاب کرتے ہوئے کہا کہ سپریم کورٹ کی گولڈن جوبلی تقریبات اور جوڈیشل کانفرنس ایک اہم سنگ میل ہیں ۔ انہوں نے جوڈیشل کانفرنس کے بہترین انتظامات کی ہدایات جاری کیں اور کہا کہ مہمانوں کے قیام، طعام اور استقبال میں اعلیٰ معیار کو یقینی بنایا جائے گا ۔
انتظامی جج کا بیان
جسٹس رضا علی خان نے اجلاس میں انتظامات کی تفصیلات پیش کیں اور کہا کہ آنے والے دنوں میں اہم اجلاس طلب کر کے مزید بہتری کے اقدامات کیے جائینگے۔ آئندہ ہفتے ایک اور اجلاس منعقد ہوگا جس میں سپریم کورٹ آزاد جموں و کشمیر کی اسٹیبلشمنٹ اور متعلقہ حکومتی محکموں کے سربراہان شرکت کریں گے تاکہ جوڈیشل کانفرنس کے انتظامات کیلئے مشترکہ حکمت عملی طے کی جا سکے۔
