(کشمیر ڈیجیٹل) انڈر 19 ورلڈ والی بال چیمپئن شپ کے پری کوارٹر فائنل میں ریفری کے متنازع فیصلے پر پاکستان نے شدید احتجاج کیا ہے۔
ازبکستان میں جاری چیمپئن شپ میں پاکستان اور پولینڈ کے درمیان سنسنی خیز مقابلہ ہوا جس میں پولینڈ نے پاکستان کو 2-3 سے شکست دی۔
میچ کے دوران اور خاص طور پر آخری لمحات میں ریفری کے فیصلے متنازعہ قرار دیے گئے، جس پر میچ کے اختتام پر پاکستانی کھلاڑیوں اور ریفری کے درمیان تلخ کلامی بھی ہوئی۔
پاکستان والی بال فیڈریشن کے چیئرمین چوہدری یعقوب نے کہا ہے کہ وہ اس معاملے پر عالمی والی بال تنظیم ایف آئی وی بی کو خط لکھ کر باضابطہ احتجاج کریں گے۔
چوہدری یعقوب کے مطابق آخری پوائنٹ کے بعد پاکستان ٹیم کے مینجر نے کنٹرول کمیٹی سے کہا کہ فیصلے کی فوٹیج دیکھی جائے، جس پر کمیٹی کے نمائندے نے تسلیم کیا کہ پولینڈ کی جانب سے فاؤل ہوا تھا اور اس پر معذرت بھی کی، تاہم ریویو کی سہولت دستیاب نہ ہونے کے باعث فیصلہ تبدیل نہیں کیا جا سکا۔
یہ بھی پڑھیں: اسلام آباد کی انسداد دہشتگردی عدالت نے سردار عبدالقیوم نیازی کے وارنٹ گرفتاری جاری کر دیے
ریفری کے ان فیصلوں پر سوشل میڈیا پر والی بال شائقین کی جانب سے بھی شدید تنقید دیکھنے میں آئی ہے۔
