(کشمیر ڈیجیٹل) پاکستان اور امریکا کے مابین تجارتی معاہدہ کامیابی سے طے پا گیا ہے جس کا مقصد دو طرفہ تجارت کو فروغ دینا، منڈیوں تک رسائی کو بڑھانا، سرمایہ کاری کو راغب کرنا اور باہمی دلچسپی کے شعبوں میں تعاون کو فروغ دینا ہے۔
وزارت خزانہ کے مطابق یہ اہم پیش رفت وزیر خزانہ سینیٹر محمد اورنگزیب کی امریکی وزیر تجارت ہاورڈ لوٹنک اور امریکی تجارتی نمائندے جیمیسن گریر سے ملاقات کے دوران ہوئی۔ ملاقات میں سیکرٹری کامرس جواد پال اور امریکا میں پاکستان کے سفیر رضوان سعید شیخ بھی شریک تھے۔
معاہدے کا اعلان امریکی صدر ڈونلڈ ٹرمپ نے ٹرتھ سوشل پر اپنی پوسٹ کے ذریعے کیا۔
وزارت خزانہ کے اعلامیے کے مطابق اس معاہدے کے نتیجے میں باہمی ٹیرف، خصوصاً امریکا میں پاکستانی مصنوعات پر لگنے والے محصولات میں کمی واقع ہو گی، جو تجارتی تعلقات میں بہتری کا باعث بنے گی۔ اعلامیے میں کہا گیا ہے کہ یہ معاہدہ دونوں ملکوں کے درمیان توانائی، معدنیات، آئی ٹی، کرپٹو کرنسی سمیت دیگر اہم اقتصادی شعبوں میں تعاون کے ایک نئے دور کا آغاز کرے گا۔
وزارت خزانہ کے مطابق یہ معاہدہ امریکا کے ساتھ پاکستان کے تجارتی تعلقات کو مزید مستحکم بنانے اور ان کو امریکی ریاستوں تک وسعت دینے کے لیے جاری کوششوں میں مددگار ثابت ہوگا۔ بیان میں مزید کہا گیا کہ اس معاہدے کے تحت دونوں ممالک کو ایک دوسرے کی منڈیوں تک بہتر رسائی حاصل ہو گی، جبکہ پاکستان کے بنیادی ڈھانچے اور ترقیاتی منصوبوں میں امریکی سرمایہ کاری کے اضافے کی توقع ہے۔
وزارت خزانہ نے اس معاہدے کو دونوں ممالک کی قیادت کی جانب سے دوطرفہ تعلقات کو گہرا کرنے اور تجارت و سرمایہ کاری کے روابط کو مضبوط بنانے کے عزم کی علامت قرار دیا۔
یہ بھی پڑھیں: پاکستان کا جدید ریموٹ سینسنگ سیٹلائٹ چین سے کامیابی سے لانچ کر دیا گیا
اس سے قبل نائب وزیراعظم و وزیر خارجہ اسحاق ڈار نے سماجی رابطے کی ویب سائٹ پر اپنے پیغام میں اس تجارتی ڈیل کا خیرمقدم کرتے ہوئے کہا تھا: “امریکا سے تجارتی ڈیل طے پا گئی ہے، الحمد للہ۔”
