(کشمیر ڈیجیٹل) فیلڈ مارشل عاصم منیر نے کہا ہے کہ “معرکہ حق” میں شکست سے دوچار بھارت دہشتگرد گروہوں کے ذریعے ہائبرڈ جنگ کو فروغ دے رہا ہے۔
آئی ایس پی آر کے مطابق، فیلڈ مارشل عاصم منیر نے نیشنل ورکشاپ بلوچستان کے 16ویں سیشن کے شرکاء سے ملاقات کی، جس میں مختلف سول افسران اور ماہرین تعلیم نے بھی شرکت کی۔
فیلڈ مارشل نے بھارت کی جانب سے دہشت گرد عناصر کی سرپرستی کی شدید مذمت کرتے ہوئے کہا کہ بھارت “معرکہ حق” میں شکست کھا چکا ہے اور اب دہشت گرد گروہوں کے ذریعے ہائبرڈ جنگ کو ہوا دے رہا ہے۔ انہوں نے مزید کہا کہ “یہ گروہ بھی معرکہ حق میں بھارت کو ذلت آمیز شکست جیسا ہی انجام پائیں گے۔”
ان کا کہنا تھا کہ دہشت گردی نہ مذہب دیکھتی ہے، نہ فرقہ اور نہ ہی نسل۔ دہشت گردی کے خاتمے کے لیے قومی سطح پر یکجہتی اور مشترکہ عزم ناگزیر ہے۔
فیلڈ مارشل عاصم منیر نے بھارت کے ان اقدامات کو بلوچستان کے عوام کی حب الوطنی کو نشانہ بنانے کی ناکام کوشش قرار دیا اور کہا کہ پاکستان کو درپیش اندرونی یا بیرونی خطرات کی صورت میں قومی وقار اور عوام کے تحفظ کو ہر صورت یقینی بنایا جائے گا۔
مزید برآں، انہوں نے بلوچستان میں جاری ترقیاتی منصوبوں کی اہمیت کو اجاگر کرتے ہوئے تمام قومی اداروں کے درمیان ہم آہنگی اور مشترکہ حکمت عملی اپنانے کی ضرورت پر زور دیا۔
یہ بھی پڑھیں: پاکستان کا سلامتی کونسل سے مسئلہ کشمیر پر فوری اقدام کا مطالبہ
