اسلام آباد:وزیر اطلاعات آزاد کشمیر پیر محمد مظہر سعید شاہ نے وفاقی وزیر برائے مذہبی امور سردار محمد یوسف سے ملاقات کی اورسعودی عرب کی جانب سے حج مشن 2025 میں شامل تمام ممالک میں سے بہترین انتظامات پر ایوارڈ ملنے پر مبارکباد پیش کی۔
ملاقات میں آزاد کشمیر حکومت کے ساتھ مل کر مذہبی و مسلکی ہم آہنگی پر کام کرنے پر اتفاق کیا گیا اور نئی حج پالیسی پر بھی تبادلہ خیال کیا گیا۔
وزیر اطلاعات پیر محمد مظہر سعید شاہ نے وفاقی وزیر سردار محمد یوسف کو آزاد جموں و کشمیر کے دورے کی باضابطہ دعوت دی جو انہوں نے قبول کر لی۔
یہ بھی پڑھیں: وزیراطلاعات مظہر سعید شاہ کی وفاقی وزیرمصطفیٰ کمال سے ملاقات، ہیلتھ پیکیج پر تبادلہ خیال
وفاقی وزیر سردار محمد یوسف نے کہا کہ آزادکشمیر میں مسلکی ہم آہنگی برقرار رکھنے اور اسلامی اقدار کے فروغ میں وہاں کے علماء کرام و مشائخ عظام کا اہم کردار ہے۔ حکومت آزادکشمیر کے ساتھ مل کر مذہبی و مسلکی ہم آہنگی کے فروغ کیلئے کام کریں گے۔
اس موقع پر گفتگو کرتے ہوئے وزیر اطلاعات پیر محمد مظہر سعید شاہ نے کہا کہ سعودی عرب کی جانب سے پاکستان کی وزارت مذہبی امور کو بہترین حج انتظامات کا ایوارڈ ملنا ہمارے لیے باعث اعزاز ہے،انہوں نے سردار محمد یوسف کی پیشہ وارانہ صلاحیتوں کی بھی ستائش کی۔
وزیر اطلاعات آزاد کشمیر نے کہا کہ آزادکشمیر میں بہترین مذہبی و مسلکی ہم آہنگی موجود ہے، امن و امان کے لحاظ سے آزاد کشمیر پاکستان بھر میں پر امن خطہ ہے۔
اللہ کا شکر ہے محرم الحرام کے دوران مثالی مسلکی ہم آہنگی اور امن و امان برقرار رہا۔
