عالمی منڈی میں خام تیل کی قیمتوں میں مسلسل اضافہ اور روپے کی قدر میں اتار چڑھاؤ جاری ہے، جس کے باعث پاکستان میں پیٹرولیم مصنوعات ایک بار پھر مہنگی ہونے جا رہی ہیں۔ حکومت نے اس حوالے سے قیمتوں پر نظرِثانی شروع کر دی ہے اور ابتدائی سفارشات تیار کر لی گئی ہیں۔
ذرائع کے مطابق 16 جون سے پیٹرول کی قیمت میں 1 روپے 12 پیسے اور ہائی اسپیڈ ڈیزل کی قیمت میں 5 روپے 27 پیسے فی لیٹر اضافے کی تجویز دی گئی ہے۔ اگر یہ اضافہ منظور ہو جاتا ہے تو پیٹرول کی نئی قیمت 254.75 روپے اور ڈیزل کی قیمت 259.91 روپے فی لیٹر ہو جائے گی۔ پیٹرول عوام میں سب سے زیادہ استعمال ہونے والی مصنوعات میں شامل ہے، جو نجی گاڑیوں، موٹر سائیکلوں اور رکشوں میں استعمال ہوتا ہے۔ اس کی قیمت میں معمولی اضافہ بھی عام شہری کے بجٹ پر اثر انداز ہوتا ہے۔ دوسری جانب ڈیزل زیادہ تر بھاری گاڑیوں، بسوں، ٹرکوں، اور زرعی مشینری میں استعمال ہوتا ہے، جس کا تعلق براہ راست مہنگائی سے جوڑا جاتا ہے۔
اس کے ساتھ ساتھ مٹی کے تیل کی قیمت میں 4 روپے 16 پیسے اور لائٹ ڈیزل آئل میں 4 روپے 13 پیسے فی لیٹر اضافے کی بھی سفارش کی گئی ہے۔ یہ تمام نئی قیمتیں 16 جون سے نافذ العمل ہوں گی اور اگلے 15 دن کے لیے مؤثر رہیں گی، جس کے بعد دوبارہ عالمی نرخوں کے مطابق قیمتوں پر نظرثانی کی جائے گی۔ اقتصادی ماہرین کے مطابق، برینٹ خام تیل کی قیمت 83 ڈالر فی بیرل سے تجاوز کر چکی ہے، جس کا اثر پاکستان میں پیٹرولیم مصنوعات کی لاگت پر پڑ رہا ہے۔ مزید یہ کہ آئی ایم ایف معاہدے کے تحت حکومت پیٹرولیم لیوی میں بھی اضافہ کر چکی ہے، جس سے قیمتوں پر مزید دباؤ بڑھ گیا ہے۔
یہ بھی پڑھیں: پیٹربرو کونسل ہال میں کشمیر کی صدا ! بشیر سدوزئی کی مئیر جوڈی فوکس سے پُراثر ملاقات
پیٹرولیم مصنوعات کی قیمتوں میں حتمی فیصلہ وزارتِ خزانہ وزیراعظم شہباز شریف کی منظوری سے کرے گی۔
