نیشنل ڈیزاسٹر مینجمنٹ اتھارٹی (این ڈی ایم اے) نے 10 جولائی تک آزاد کشمیر سمیت ملک بھر میں شدید بارشوں اور ممکنہ سیلابی صورتحال کا الرٹ جاری کیا ہے۔
ترجمان این ڈی ایم اے کے مطابق آزاد کشمیر میں دریائے جہلم اور اس کے معاون ندی نالوں میں اچانک طغیانی کا خدشہ ہے، جب کہ شمال مشرقی پنجاب کے پیر پنجال سلسلے سے نکلنے والے نالوں میں بھی سیلاب کا خطرہ موجود ہے۔
گلگت بلتستان میں دریائے ہنزہ سمیت دیگر ندی نالوں میں پانی کی سطح میں اچانک اضافہ ممکن ہے۔ دوسری جانب پنجاب، سندھ، بلوچستان اور خیبرپختونخوا میں بھی ندی نالوں اور دریاؤں میں طغیانی کا امکان ظاہر کیا گیا ہے۔ دریائے چناب کے مرالہ اور قادرآباد کے مقامات پر کم درجے کے سیلاب کی پیشگوئی کی گئی ہے۔
ترجمان کے مطابق دریائے کابل، سندھ، چناب، سوات، پنجکوڑہ، چترال، ہنزہ اور دیگر ندی نالوں کے بہاؤ میں اضافہ متوقع ہے۔ شدید بارشوں کے باعث شمال مشرقی پنجاب، جنوبی بلوچستان اور آزاد کشمیر کے کئی علاقے متاثر ہو سکتے ہیں۔
جنوبی بلوچستان کے کیرتھر رینج سے نکلنے والے ندی نالوں، خاص طور پر آواران، خضدار، جھل مگسی، قلعہ سیف اللہ اور موسیٰ خیل میں سیلابی صورتحال پیدا ہونے کا خدشہ ہے۔
عوام کو ہدایت کی گئی ہے کہ تیز بہاؤ کی صورت میں ندی نالوں، پلوں اور پانی میں ڈوبی سڑکوں سے گزرنے سے مکمل پرہیز کریں۔ این ڈی ایم اے نے نشیبی علاقوں کے مکینوں کو قیمتی اشیاء اور مویشی محفوظ مقامات پر منتقل کرنے کا بندوبست کرنے اور 3 سے 5 دن کی خوراک، پانی اور ادویات پر مشتمل ایمرجنسی کٹ تیار رکھنے کی ہدایت کی ہے۔
تمام متعلقہ اداروں کو ہدایت جاری کی گئی ہے کہ مقامی انتظامیہ نکاسی آب کے لیے مشینری اور پمپس تیار رکھے، اور سیلابی علاقوں کے رہائشی موبائل الرٹس اور ٹی وی کے ذریعے سرکاری انتباہات سے باخبر رہیں۔
یہ بھی پڑھیں: زیتون کا تیل: دل، دماغ، ہڈیوں اور کینسر کے خلاف قدرتی محافظ
عوام سے گزارش کی گئی ہے کہ این ڈی ایم اے کی “ڈیزاسٹر الرٹ” ایپ سے موسم اور ممکنہ خطرات سے متعلق بروقت رہنمائی حاصل کریں اور کسی بھی ہنگامی صورتحال سے نمٹنے کے لیے پیشگی اقدامات یقینی بنائیں۔
